У Беларусі пакажуць забаронены ў Расіі амерыканскі фільм пра часы Сталіна
Стужку “Нумар 44” у Расіі пазбавілі пракатнага пасведчання за “скажэнне гістарычных фактаў і своеасаблівы погляд на падзеі”.
У Беларусі пакажуць галівудскі фільм “Нумар 44” (у арыгінале Child 44), нягледзячы на тое, што 15 красавіка яго забаранілі ў Расіі. За дзень да выхаду ў пракат Міністэрства культуры суседняй краіны на папярэднім праглядзе стужкі вырашыла, што паказ яго кінатэатрах недапушчальны.
"Па выніках прэс-прагляду фільма "Нумар 44" у Міністэрства культуры РФ паступілі пытанні, якія тычацца зместу фільма: у першую чаргу — скажэнні гістарычных фактаў і своеасаблівых трактовак падзей да, падчас і пасля Вялікай Айчыннай вайны, а таксама вобразаў і характараў савецкіх грамадзян той гістарычнай эпохі… Меркаванні пракатчыкаў і прадстаўнікоў Мінкультуры супалі: пракат падобнага роду фільмаў напярэдадні 70-годдзя Перамогі недапушчальны", — гаворыцца ў афіцыйным каментары Мінкультуры з нагоды забароны фільма.
Як даведалася Еўрарадыё, у Беларусі прэм’ера фільма не адмяняецца. “Мы ведаем пра сітуацыю ў Расіі, але ў нас фільм ужо закачаны, квіткі прадаюцца, ён будзе паказаны ва ўсіх кінатэатрах”, — гавораць у Аддзеле рэпертуарнага планавання і прагназавання “Кінавідэапраката”.
Дзеянне фільма “Нумар 44” разгортваецца ў СССР часоў Іосіфа Сталіна. Галоўны герой — афіцэр савецкай разведкі Леў Дзямідаў. Ён расследуе серыю дзіцячых забойстваў, але такая дзейнасць выклікае падазрэнне ў савецкіх уладаў. Фільм бюджэтам больш за 50 мільёнаў долараў быў зняты сумесна ў ЗША, Вялікабрытаніі, Румыніі і Чэхіі. Рэжысёр Даніэль Эспіноса.
Прэм’ера ў Беларусі — 16 красавіка. Фільм пакажуць у Мінску, Гродне і Віцебску.