Святар-экзарцыст: Перадача пра экстрасэнсаў на БТ дрэнна паўплывае на вернікаў

З’яўленне на Беларускім тэлебачанні новага шоў пра экстрасэнсаў не варта драматызаваць. Пра гэта выданню Krynica.info заявіў каталіцкі святар, экзарцыст Віцебскай дыяцэзіі, айцец Аляксандр Жарнасек. На думку святара, “у большы тупік жыццё чалавека, які жыве без Бога, чым той, у які яно ўжо загнанае, гэтая перадача не загоніць”.

Аднак пры гэтым прадстаўнік каталіцкай царквы не бачыць нічога добрага ў з’яўленні новага шоў “Хачу ў тэлевізар. Экстрасэнсы”. Па словах айца Жарнасека, такія шоў працуюць на “атупленне гледача”, а чалавек, якому патрэбныя такія перадачы, усё адно знойдзе іх на расійскім тэлебачанні.

Пры гэтым святар не верыць, што ў беларускае шоў прыйдуць сапраўдныя чараўнікі — гэта будуць “шарлатаны ці проста упэўненыя ў сабе людзі, гатовыя згуляць і такую ​​ролю”.

Што тычыцца вернікаў, то для іх прагляд такіх перадачаў сапраўды можа несці непрыемныя наступствы, — тлумачыць святар. “Гэта не азначае, што вось чалавек паглядзеў такую перадачу, — і ўсё, жыццё ў яго змянілася, пачалася праблемы, — але праблемы сапраўды пачынаюцца, у двух словах гэтага не распавядзеш, гэта кожны раз індывідуальны выпадак кожнага чалавека”, — дадае айцец Аляксандр, спасылаючыся на досвед сваёй экзарцысцкай практыкі.