Радзівонаў: БАТЭ пасталеў, матч з "Баварыяй" можа атрымацца
У чацвер у Беларусь вярнуліся футбалісты барысаўскай каманды, якія паспяхова стартавалі ў групавым этапе Лігі чэмпіёнаў.
19 верасня БАТЭ перамог у Францыі "Ліль" — 3:1 і цяпер лідыруе ў групе "F". Наступны сапернік барысаўчан — мюнхенская "Баварыя", якая ўчора выйграла ў іспанскай "Валенсіі" з лікам 2:1. Матч са славутым клубам пройдзе на мінскім стадыёне "Дынама" 2 кастрычніка.
Нападаючы БАТЭ Віталь Радзівонаў ў аэрапорце пасля прылёту з Францыі пракаментаваў "Прессболу" перамогу над "Лілем" і выказаўся наконт далейшых перспектываў у Лізе чэмпіёнаў.
"Мы вельмі сур'ёзна рыхтаваліся да гэтага матчу, у тым ліку — псіхалагічна, — кажа Віталь Радзівонаў. — Самі не чакалі, што да перапынку паспеем зарабіць такую перавагу. Адчуваецца, што каманда пасталела; пачынае сказвацца досвед, які мы набывалі гадамі. Я думаю, што матч з "Баварыяй" атрымаецца, таму што перамога над "Лілем" падаравала нам неверагодны зарад пазітыву".
БАТЭ выйграў у гасцях у "Ліля" — 3:1 (фота, відэа)
Уткін: Указкай, лапатай, лабатаміяй — выбіць з БАТЭ думкі пра выхад з групы
Фота — pressball.by, ФК БАТЭ
