Беларускія паэты адмовіліся ад запрашэння афіцыйнага саюза пісьменнікаў

Круглы стол, прысвечаны маладой літаратуры, мае адбыцца 9
лютага. Ладзяць яго Саюз пісьменнікаў Беларусі ды холдынг "Літаратура і
Мастацтва" ("ЛіМ").

Адзін з запрошаных — паэт Віталь Рыжкоў, чыя кніга
"Дзверы замкнёныя на ключы" рыхтуецца да другога выдання. Як сказаў
Віталь у гутарцы з Еўрарадыё, ён быў вельмі здзіўлены запрашэннем:

Рыжкоў: "Я быў здзіўлены — запрашалі чамусьці па-руску.
Адзінае беларускамоўнае слова, якое прагучала з вуснаў дзяўчыны, якая мяне
запрашала, гэта была абрэвіятура "ЛіМ"
.

Рыжкоў, аднак, ад запрашэння адмовіўся: ён мяркуе пайсці
толькі на сваю аўтограф-сэсію, якая пройдзе 9 лютага а 14-й на стэндзе кнігарні
"Логвінаў".

Дарэчы, запрашэнні паступілі не толькі паэтам, якія не
ўваходзяць ні ў якія творчыя аб'яднанні, як Віталь Рыжкоў. На кніжную выставу
запрасілі сяброў апальнага Саюзу беларускіх пісьменнікаў Анатоля Івашчанку і
Усевалада Сцебураку. Яны таксама адмовіліся. У каментары Еўрарадыё Сцебурака
патлумачыў прычыны:

Сцебурака: "Я не думаю, што гэта будзе карысна і
патрэбна. Гэта хутчэй будзе для вонкавай прадстаўнічасці гэтага форума.
Наколькі я ведаю, не я адзін адмовіўся... Я стаўлюся да саюза, створанага
штучна, — думаю, як усе свядомыя, адэкватныя людзі, якія разумеюць, што гэта
прафанацыя. Удзельнічаць у ёй не карысна ні для творчасці, ні для прыватнай
асобы. І пазней будзе сорамна за такія хады. Гэта не ёсць дыялог паміж нейкімі
там плынямі..."

На фота: Усевалад Сцебурака і Віталь Рыжкоў ( budzma.org, radzimaphoto.com)