Расія ўхваліла выдачу палітзняволенай Яны Пінчук у Беларусь

Расія ўхваліла выдачу палітзняволенай беларускі Яны Пінчук у Беларусь. Пра гэта яе муж Мікіта Сафронаў расказаў тэлеканалу, прызнанаму ў Беларусі экстрэмісцкім.

"Яне ў СІЗА прыйшла пастанова пра яе экстрадыцыю ў Беларусь. Пакуль яна ўсё яшчэ знаходзіцца ў пецярбургскім СІЗА-5. Адвакаты будуць абскарджваць гэтае рашэнне, але дата суда пакуль не прызначаная", — кажа Мікіта.

24-гадовая Яна Пінчук была затрыманая напрыканцы 2021 года ў Санкт-Пецярбургу. Яна ўжо чатыры гады легальна жыве і працуе ў Расіі. У Беларусь апошні раз прыязджала ў 2020-м. 

У Беларусі дзяўчыну вінавацяць па пяці артыкулах Крымінальнага кодэкса за адміністраванне тэлеграм-чата "Віцебск 97%" — ён прызнаны экстрэмісцкім. Яне пагражае да 20 гадоў пазбаўлення волі. 

Пасля арышту Пінчук папрасіла надаць ёй статус бежанкі. Расійскія праваабаронцы прызналі яе палітзняволенай.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.