Пракуратура адмовілася разглядаць петыцыю пра ўмовы на Акрэсціна

Пракуратура Мінска адмовілася разглядаць петыцыю з патрабаваннем праверыць умовы ўтрымання ў ЦІП на Акрэсціна. Пра гэта гаворыцца ў афіцыйным адказе на петыцыю на сайце petitions.by. Падпісаў яго начальнік аддзела па наглядзе за выкананнем заканадаўства і законнасцю прававых актаў У. Крукоўскі.

Фатаздымкі з "палітычных" камераў Акрэсціна апублікавалі напрыканцы ліпеня праваабаронцы "Вясны". На здымках было бачна, што ў перапоўненай камеры людзі спяць на стале і падлозе, у іх няма ніякай пасцельнай бялізны. 

Беларусы склалі петыцыю ў пракуратуру з патрабаваннем праверыць гэтыя ўмовы і прыняць меры. 

У адказе з пракуратуры гаворыцца, што падаваць скаргі могуць толькі грамадзяне, чые правы былі парушаныя, альбо іх паўнамоцныя прадстаўнікі. Таму петыцыя пакінутая без разгляду. 

Дарэчы, афіцыйны прадстаўнік Генпракуратуры Дзмітрый Брылёў у каментары "Народнай Волі" таксама выказаў сумнеў у сапраўднасці фота і заявіў, што цяпер з'яўляецца шмат фэйкаў.