Мінскія следчыя шукаюць сведкаў збіцця кіроўцы і пасажыраў аўтобуса
У хуліганстве падазраюць групу грамадзян Азербайджана.
Першамайскі райаддзел Следчага камітэта расследуе крымінальную справу аб злосным хуліганстве, пачатую на грамадзяніна Азербайджана.
Як паведамляе БелаПАН, інцыдэнт адбыўся 26 лістапада каля 21.30 на вуліцы Кедышкі. У аўтобусе 95-га маршруту каля дома 33а былі збітыя кіроўца аўтобуса і яшчэ трое грамадзян.
У хуліганстве следчыя падазраюць групу грамадзян Азербайджана. На аднаго з іх пачалі крымінальную справу. Яшчэ двух затрымалі, бо падазраюць у датычнасці да злачынства. Паводле папярэдняй інфармацыі, у групе азербайджанцаў было больш за дзесяць чалавек.
Цяпер следчыя высвятляюць акалічнасці, у тым ліку асобы, колькасць і ролю удзельнікаў інцыдэнту. Сведкаў просяць звярнуцца ў Першамайскі аддзел Следчага камітэта.
