Менш дыпламатаў, больш вайскоўцаў: каго ВНУ Беларусі чакаюць сёлета

10/06/2022 - 13:34

Абітурыенты перад будынкам хімфака БДУ / "Спутник"

Абітурыенты перад будынкам хімфака БДУ / "Спутник"

Уступная кампанія пачнецца ў Беларусі ўжо ў сярэдзіне чэрвеня. Спачатку, як і ў папярэднія гады, пройдзе цэнтралізаванае тэставанне (ЦТ), а пазней пачнецца этап падачы дакументаў — самы нервовы для абітурыентаў і бацькоў.

Каго набіраюць сёлета ўніверсітэты, дзе могуць быць самыя высокія і самыя нізкія прахадныя балы, вывучыла Еўрарадыё.

53,5 тысячы месцаў

Усяго ў гэты "сезон" беларускія ВНУ плануюць набраць 53,5 тысячы чалавек, з іх больш як палова (27,7 тысячы) могуць разлічваць на бясплатнае навучанне. У параўнанні з мінулым годам агульная колькасць месцаў зменшылася на 1,4 тысячы, гэта значыць адносна ненашмат.

Ашаламляльных змен з пункту гледжання планаў набору ва ўніверсітэты ў 2022-м не адбылося. Сярод найбольш цікавых навінак: адмова ад набору на платнае аддзяленне па спецыяльнасці "Журналістыка" ў БДУ, застаюцца толькі бюджэтныя месцы.

Прыкметна "падрэзалі" ў БДУ набор на платнае аддзяленне факультэта міжнародных адносін: калі ў 2021-м там было 294 месцы, то цяпер — 163. Затое трошкі вырас набор на бюджэт: з 67 да 90. Аналагічная сітуацыя ў Інстытуце імя Сахарава: паменшыўшы набор на "платку", дадалі пару месцаў на бюджэтным аддзяленні.

На паўсотні чалавек больш сёлета хоча набраць Ваенная акадэмія: было 484 месцы. Стала 531. А вось Акадэмія МУС набор не павялічвала.

Па некаторых спецыяльнасцях зусім крыху паменшылі набор у БНТУ: напрыклад, на "Архітэктуры" стала менш месцаў, калі параўноўваць з пазамінулым годам. Затое стала больш месцаў на "Бізнес-адміністраванні", дзе амаль усе — на платным аддзяленні.

Галоўная "айцішная" ВНУ краіны, БДУІР, скараціла набор на адной з самых папулярных сваіх спецыяльнасцяў — на геймдызайнераў было сумарна 120 месцаў, стала 105, памяншэнне адбылося за кошт платнага аддзялення. Колькасць платных месцаў знізілі і для спецыяльнасцяў "эканаміст-праграміст" і "маркетолаг-праграміст". Затое не кранулі напрамкі, дзе навучаюць па спецыяльнасці "інжынер па радыёэлектроніцы" — але яна адна з найменш запатрабаваных.

Ці зменяцца ўступныя балы?

Лагічна выказаць здагадку, што на найбольш запатрабаваных спецыяльнасцях сярод тых, куды "падрэзалі" набор, конкурс у 2022-м вырасце. Падымуцца і прахадныя балы, што тлумачыцца вельмі проста: на тым жа ФМА БДУ раней прахадны быў той, які набраў 294-ы абітурыент, а цяпер будзе такі, як у 163-га.