Маці падлетка-палітвязня з салідарнасці з сынам пагаліла галаву

Маці палітвязня Віталя Прохарава са Жлобіна ў знак салідарнасці з сынам пагаліла галаву, паведамляюць гомельскія праваабаронцы.

Прохарава затрымалі 10 жніўня на пратэстах і моцна збілі, пра гэта Віталь распавядаў у судзе. Потым яго адпусцілі, але пазней выклікалі ў суд і аштрафавалі за ўдзел у несанкцыянаваным мерапрыемстве. Падставай для крымінальнай справы стаў відэаролік у сацсетках, які зняў сябр падлетка. На ім Віталь хваліўся, што каменем разбіў шкло аўтазака.

На судзе Прохараў казаў, што што камень ён не кідаў, а ролік запісаў дзеля піяру. Сведка, які выступаў на судзе са змененым імем, адрасам і голасам, казаў, што не бачыў момант, калі Прохараў кідаў камень. Аднак на пытанне пракурора "так кідаў ці не камень Прохараў?" сведка упэўнена адказаў — кідаў.

У выніку падлетка прыгаварылі да двух гадоў выхаваўчай калоніі. Паўналецце ён сустрэў у зняволенні.

"І не таму, што гэта яго выбар, і ён дрэннае дзіця, а таму, што хто-то гэты выбар зрабіў за яго", — кажа мама падлетка перш, чым пачаць згольваць валасы.

Праваабаронцы прызналі Віталя Прохарава палітвязнем.