Лукашэнка не пацвердзіў, што сябруе з Грузіяй супраць Расіі

Развіццё адносінаў паміж Беларуссю і Грузіяй не з’яўляецца “сяброўствам супраць Расіі”. Такую заяву зрабіў сёння на фэсце “Дажынкі-2007” у Рэчыцы Аляксандр Лукашэнка, паведамляе БЕЛТА.

Нагадаем, нядаўна Мінск наведаў міністр унутраных справаў Грузіі, які вёў перамовы з кіраўніком Беларусі. Пасля гэтага дзяржаўныя СМІ пачалі называць грузінскага прэзідэнта Міхаіла Саакашвілі “сябрам беларускага народу”, хоць раней яго бязлітасна бэсцілі.

Расійскі “Коммерсантъ” мяркуе, што Беларусь папрасіла Грузію выступіць своеасаблівым пасярэднікам у адносінах з Захадам.

У суботу Лукашэнка, адказваючы на пытанні журналістаў, адзначыў: “Расійскія дыпламаты вельмі часта сустракаюцца з грузінскімі калегамі. Мы ж гэта не расцэньваем як сяброўства супраць Беларусі”.

У той жа час кіраўнік Беларусі заявіў, што “мы суверэнная дзяржава, якая мае права будаваць адносіны з іншымі дзяржавамі, зыходзячы са сваёй уласнай выгады”.

Апошнія навіны

Галоўнае

Выбар рэдакцыі