Колькасць палітвязняў у Беларусі перавысіла 600 чалавек
Сёння палітвязнямі прызналі сем чалавек.
Праваабаронцы прызналі палітвязнямі яшчэ сем чалавек, паведамляе сайт "Вясна".
Максім Сарычаў асуджаны за абразу супрацоўніка міліцыі ў тэлеграм-чаце — 1 год абмежавання волі з накіраваннем ва ўстанову адкрытага тыпу;
Яўген Цітоў асуджаны за сарваны дзяржаўны сцяг — 1 год абмежавання волі з накіраваннем ва ўстанову адкрытага тыпу;
Давід Шаракоў асуджаны за абразу былога намесніка міністра ўнутраных спраў Аляксандра Барсукова ў тэлеграм-чаце — 2 гады абмежавання волі з накіраваннем ва ўстанову адкрытага тыпу;
Сяргей Велікародны асуджаны за абразу прэзідэнта — 1 год і 6 месяцаў пазбаўлення волі ў калоніі агульнага рэжыму;
Ілля Дзярагін асуджаны за абразу прэзідэнта — 3 месяцы арышту;
Юрый Кавалёў асуджаны за абразу прэзідэнта — 1 год пазбаўлення волі ў калоніі агульнага рэжыму;
Дзмітрый Краўцоў асуджаны за здзек з дзяржаўнага герба Беларусі — 3 месяцы арышту.
Праваабаронцы патрабуюць неадкладна вызваліць гэтых палітвязняў і спыніць іх крымінальны пераслед. Таксама яны заклікаюць "прыняць захады, скіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асобаў".
Пад заявай падпісаліся праваабарончы цэнтр "Вясна" (зачынены ўладамі), Беларускі ПЭН-цэнтр, РГА "Прававая ініцыятыва", Беларускі дакументацыйны цэнтр, кансультацыйны цэнтр па актуальных міжнародных практыках і іх імплементацыі ў праве "Х'юман канстанта", "Ідэнтычнасць і права", РПГА "Беларускі Хельсінкскі Камітэт", Беларуская асацыяцыя журналістаў.
На сёння ў Беларусі налічваецца 606 палітвязняў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.