Два гады "хатняй хіміі" — за рэпост фатажабы з Лукашэнкам і Кім Чэн Ынам
Два гады "хатняй хіміі" прысудзілі 30-гадоваму прадпрымальніку з Баранавічаў Аляксандру Марушкевічу за рэпост карцінкі, паведамляюць праваабаронцы "Вясны".
Суддзя Мікалай Кміта прызнаў яго вінаватым у абразе Лукашэнкі (ч. 1 арт. 368 КК).
Абвінавачанне грунтавалася на тым, што ў 2020 годзе Марушкевіч перапосціў у сябе ў сторыз у Інстаграме выяву лідара КНДР Кім Чэн Ына з вусамі і подпісам "Кон Чен Ый". Намесніца баранавіцкага міжраённага пракурора, дарадца юстыцыі Іна Данільчык вырашыла, што гэта выява Аляксандра Лукашэнкі. У міліцыю Марушкевіча выклікалі ўжо ў 2022 годзе, дзе ў архіве сторыз знайшлі гэты фатаздымак.
На судзе прыдпрымальнік цалкам прызнаў віну. У яго трое малалетніх дзяцей (6 і 4 гадоў, а таксама 8-месячнае немаўля).
Дарэчы, на суд над Марушкевічам прывезлі "хатніх хімікаў" Баранавічаў, каб зладзіць "публічнае пакаранне".
