Чэмпіянат Беларусі па футболе транслююць у дзясятку краін, у тым ліку і ў Індыі

Правы на трансляцыю чэмпіянату Беларусі па футболе набыў адзін з спартыўных тэлеканалаў Індыі, паведамляе by.tribuna.com. Цяпер беларускі футбол глядзяць у дзясятку краін — Украіне, Расіі, Ізраілі, Сербіі, Босніі і Герцагавіне, Харватыі, Славеніі, Чарнагорыі, Паўночнай Македоніі і ў згаданай Індыі. Дагэтуль замежныя вяшчальнікі правы на беларускае нацыянальнае футбольнае першынство не набывалі. Цяпер жа яго паказваюць сербскі Sport klub 1, расійскі "Матч ТВ", украінскі Sport 1, ізраільскі Sport 5.

Украінскае інтэрнэт-выданне FootballHub пасля набыцця правоў напісала: "Бомба! Мы пакажам вам адзіны чэмпіянат, які застаўся". І не мае рацыі. Акрамя беларускага, чэмпіянат па футболе з-за каранавіруса яшчэ не спынены ў Нікарагуа.

27 сакавіка стартуе другі тур чэмпіянату Беларусі па футболе ў вышэйшай лізе, адбудуцца два матчы. Брэсцкі "Рух" прыме сталічны "Энергетык-БДУ" (абедзьве каманды ў першым туры атрымалі сенсацыйныя перамогі), "Тарпеда-БелАЗ" — "Белшыну".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.