Чайкоўская: “Беларусь — яна мая”, у гэтых трох словах уся мая нацыянальная ідэя
9 снежня ў эфіры Еўрарадыё — рэжысёрка, дырэктарка незалежнага кінафестывалю Беларусі “Паўночнае ззянне”, заснавальніца прадзюсарскай кампаніі Volia Films Воля Чайкоўская.
Каб рухацца далей і развівацца, нам неабходна змяніць адносіны паміж сабой, зрабіць іх больш “сямейнымі”. Бо беларусы — гэта адна сям’я. І пачаць варта з разумення, што ў словы “Беларусь — яна мая” ўкладваецца не жаданне прысабечыць гэтую Беларусь, а зразумець, што Беларусь — гэта як жанчына, якую беларусы мусяць любіць і шанаваць, перакананая Воля Чайкоўская.
Пра тое, як нам дасягнуць балансу ўзаемаадносінаў і якую ролю ў гэтым мусіць адыграць айчынны кінематограф, мы і разважаем у праграме “Ідэя Х” з Воляй Чайкоўскай.
Чытаць кнігу "Беларуская нацыянальная ідэя" (PDF) можна тут
Філосафы і мысляры мінулага сцвярджалі, што нацыянальная ідэя павінна быць у кожнай нацыі. Нехта перакананы, што мы яшчэ да сваёй нацыянальнай ідэі не дараслі. Іншыя сцвярджаюць, што такая ідэя ў беларусаў ёсць.
Дык ёсць у беларускай нацыі свая нацыянальная ідэя ці не? І калі мы да сваёй націдэі яшчэ не дараслі, то ці можам лічыцца нацыяй? Магчыма, нам варта ўзяць ды сфармуляваць такую ідэю для беларусаў?
На нашу думку, прыспеў час распачаць дыскусію і вызначыць, сфармуляваць беларускую нацыянальную ідэю. І мы працягваем гэта рабіць у аўтарскай праграме “Ідэя Х”, якую па-ранейшаму вядуць рэдактар Еўрарадыё Зміцер Лукашук і маскоўскі філосаф Максім Гаруноў.
Па завядзёнцы ў якасці гасцей, якія дапамагаюць нам фармуляваць нацыянальную ідэю, — палітыкі і літаратары, эканамісты і музыканты, айцішнікі і культуролагі. Усе вы.
Праграма выходзіць штотыдзень у чацвер у 14:00.
Партнёры праграмы — крама з нацыянальным каларытам Symbal.by і грамадская кампанія "Годна".
Папярэднія выпускі праграмы "Ідэя Х" можна глядзець тут:
