Беларус у касцюме Чалавека-павука зарабіў 4 пераломы пры скачку ў ГУМе ў Маскве
Чатыры пераломы атрымаў грамадзянін Беларусі, які вырашыў скочыць з вышыні ў маскоўскім ГУМе, піша mk.ru.
На вачах шматлікіх пакупнікоў мужчына ў касцюме Чалавека-павука скочыў з другога паверха. Здарэнне адбылося ўвечары 26 снежня.
Паведамляецца, што 29-гадовы Дзмітрый, які займаецца бізнесам у сферы IT-тэхналогій, прыехаў у Маскву, каб сустрэць Новы год і зняць экстравагантнае відэа. У касцюме Чалавека-павука ён разам з сябрам пайшоў у галоўную краму расійскай сталіцы. Сябар мусіў здымаць на відэа ўчынак Дзмітрыя.
Начальнік службы бяспекі ГУМа стаў відавочцам здарэння: "Такіх прыдуркаў я ў сваім жыцці яшчэ не бачыў! Скачок быў здзейснены на маіх вачах. Больш за тое, пасля падзення малады чалавек расшпіліў шырынку і спрабаваў памачыцца ў куце. Думаю, што ён быў пад уздзеяннем прэпаратаў, таму што ад яго не пахла алкаголем. Бо лекары ў яго дыягнаставалі чатыры пераломы на дзвюх нагах, а ён стаяў, як ні ў чым не было!"
Медыкі шпіталізавалі "чалавека-павука". У яго дыягнаставалі пераломы галёнкаступнёвага сустава і пятачнай косткі на абедзвюх нагах. Новы год яму давядзецца адзначаць у лякарні.
Сам "акрабат" расказвае пра свой учынак так: "У той дзень мы хадзілі па цэнтры Масквы, я быў у касцюме. Дзеці са мной фатаграфаваліся, сябра здымаў ролік з маім удзелам. Потым нешта на мяне накаціла, і мы пайшлі ў ГУМ. Там я не разлічыў вышыню і няправільна згрупаваўся".
