З'явіліся першыя фота самалёта "Белавіа", перафарбаванага для Wargaming

Аб тым, што кампанія Wargaming брэндзіравала адзін з самалётаў "Белавіа", стала вядома ў панядзелак 25 ліпеня. Аб гэтым паведаміў у сваім фэйсбуку адзін з кіраўнікоў авіякампаніі Ігар Чаргінец.

Першыя здымкі самалёта, зробленыя ў ангары у чэшскай Астраве, дзе яго перафарбоўвалі, з'явіліся за два дні да афіцыйнай прэзентацыі. Іх размясціў у сваім блогу адзін з самых актыўных спотэраў (спотэры займаюцца фатаграфаваннем авіялайнераў ― Еўрарадыё) СНД Сяргей Марцірасян. На фота можна пабачыць, як Боінг-737 авіякампаніі "Белавіа" ператвараецца ў эксклюзіўны брэндзіраваны борт Wargaming.

Бартавы нумар Боінга 737, які будзе лятаць у краінах Еўропы і Азіі, EW-254PA.