За 2,5 гады шыкоўны “Боінг” спатрэбіўся б Лукашэнку толькі чатыры разы

У канцы 2011 года "Белавія" і авіякампанія Turkmenistan Airlines заключаюць здзелку аб продажы Беларусі самалёта Boeing 767-300ER. Самалёт служыў памерламу прэзідэнту Туркменістана Сапармурату Ніязаву.

“Добра, што яго купілі. Трэба было новы купляць. Але гэта ў 2,5 разы даражэй… Менш за 100 мільёнаў долараў ён каштаваў, а новы — 250-300 мільёнаў. Для кіраўніка дзяржавы. Таму можаце палічыць, выгадна гэта, ці не”, — рэагуе Лукашэнка на крытыку ў марнаванні дзяржаўных грошай.

“Салон аздоблены натуральнай скурай і каштоўнымі пародамі дрэва, сантэхніка ў душавой і туалетах выкананая з выкарыстаннем каштоўных металаў і камянёў. Абсталяваны ўсімі вядомымі відамі ўрадавай сувязі, сістэмай прадухілення паражэння ракетамі класа "зямля-паветра" і "паветра-паветра", а таксама забяспечаны парашутным абсталяваннем. Самалёт здольны ляцець без дазапраўкі да 10 400 кіламетраў”, — апісваюць абноўку журналісты.

Прычым, менавіта здольнасць “Боінга 767” да далёкіх пералётаў называецца асноўнай прычынай пакупкі. Ранейшы беларускі “Борт №1”, “Боінг 737”, мог без перасадак лётаць на адлегласці каля 5700 кіламетраў. Дальнасць “Боінга 767” — цэлых 11000 кіламетраў.

Аднак за ўвесь час, які праходзіць пасля набыцця новага “Боінга”, кіраўнік Беларусі ў далёкія вандроўкі выбіраецца ўсяго… чатыры разы. За акіян на Кубу, у Венесуэлу і Эквадор (там новы самалёт нечакана ламаецца), у Кітай і ў Інданэзію. І яшчэ раз у Венесуэлу - на пахаванне Чавэса. Агулам, з лютага 2012 года па жнівень 2014 кіраўнік Беларусі зрабіў 27 афіцыйных візітаў. Амаль палова з іх прыйшлася на Расію — 12 (5 з іх у Сочы, 6 — у Маскву, аднойчы Лукашэнка быў у Пецярбургу). У Казахстан кіраўнік Беларусі лётаў тройчы. Яшчэ па 2разы ва Украіну і Туркменістан. З усімі гэтымі палётамі лёгка справіўся б і папярэдні самалёт кіраўніка дзяржавы — урадавы “Боінг 737”.

Па дадзеных сайта flightradar24.com, за апошнія тры месяцы “Боінг 767” Лукашэнкі здзейсніў шэсць палётаў — да Астаны і назад у канцы траўня і яшчэ чатыры тэхнічныя з Мінска ў Мінск. 737-ы тым часам працягвае паспяхова лётаць. Апошні яго палёт flightradar24.com фіксуе 6 чэрвеня.

Тым часам кіраўнікі краін-суседзяў альбо зусім не маюць сваіх самалётаў, як у Літве і Латвіі, альбо карыстаюцца сціплымі бразільскімі “Эмбраерамі”, як палякі. Свае вялікія і шыкоўныя самалёты ёсць толькі ў Пуціна і Назарбаева. Быў і ў Януковіча, але ў сваю апошнюю вандроўку да Растова былы украінскі прэзідэнт скарыстацца ім не здолеў.

Спіс афіцыйных замежных візітаў Лукашэнкі з лютага 2012 года да верасня 2014.