"Як паводзіць сябе за мяжой, каб не прынялі за рускага і не пабілі?"

"У нашых "маларасійскіх" гаворках браты-экстраверты разбіраюцца слаба. Ім што ўкраінская, што беларуская — смех адзін. Аднак будзе не смешна, калі буйныя, чырванаскурыя, абпаленыя турэцкім сонцам і віскі з дзьюці-фры расійскія дзядзькі пачнуць тапіць вас шэзлонгамі ў басейне за вашыя фрыкатыўныя "г" і "ч".

Гэта кавалак фельетона, праз які беларуская турфірма "ИриАнна" перастае рэкламавацца на сайце газеты "Турызм і адпачынак". Фельетон пра тое, як паводзіць сябе за мяжой, каб не прынялі за рускага і не пабілі, быў напісаны з нагоды бойкі паміж украінскімі і расійскімі турыстамі ў турэцкім гатэлі. Пасля званка дырэктара турфірмы яго з сайта прыбралі.

Як патлумачыў Еўрарадыё дырэктар фірмы, прычына ў тым, што перш чым выказвацца, трэба мець поўную інфармацыю па збітым самалёце. Таксама яму не спадабалася, што беларусаў выстаўляюць людзьмі, якія заўсёды маўчаць, ну і з рускімі дырэктара турфірмы аб'ядноўвае больш, чым з амерыканцамі.

"Падтрымліваючы пункт гледжання еўрапейцаў і амерыканцаў, рэдактар tio.by напісала ад нашага імя. Яна ж не напісала: гэта я так думаю. З кампаніяй, якая падтрымлівае погляды прыніжэння нас як грамадзян і прыніжэння расіян, мяне гэта не задавальняе".

"Расейцы ўсё чытаюць і ўсім цікавяцца, праўда, ім гэта таксама не дапамагае, паколькі, што б ні здарылася, яны ўпэўненыя, што ва ўсім вінаватыя амерыканцы. Цывілізаваны ж свет, дзе ў асноўным лічаць за лепшае адпачываць заможныя беларусы і расіяне, мяркуючы па загалоўках вядучых выданняў і доказнай базе, а менавіта здымках са спадарожнікаў, перакананы ў тым, што няшчасныя пасажыры злапомнага малазійскага рэйса - справа рук Расіі і данецкіх сепаратыстаў".

Дарэчы, матэрыял напісаны ў жанры фельетона, і гэта падразумявае, што аўтар не выказвае чыйгосьці агульнага пункту гледжання. Па словах самой аўтаркі фельетона Ліліі Кобзік, прэтэнзіі ў турфірмы былі трошкі іншыя.

"Дырэктар турфірмы сказаў, што яны будуць адгаворваць іншыя фірмы рэкламавацца ў нас, паколькі мы супраць нашых братоў расіян, на баку ўкраінскіх бандэраўцаў".


Як жа ставіцца кіраўнік турфірмы "ИриАнна" да вайны на ўсходзе Украіны і якая сапраўдная прычына?

"Яна можа ўсё што заўгодна казаць. Я супраць таго, што там у прынцыпе адбываецца, таму што гінуць людзі. І больш за тое, у першую чаргу, я не магу падтрымліваць пункт гледжання Украіны, афіцыйных уладаў, таму што ў іх урадзе на дадзены момант і яны падтрымліваюць Правы сектар, фашысцкіх схільнасцяў і ідэалогіі, тое, што мяне не задавальняе. Мае бацькі, дзяды ваявалі, таму я не падтрымліваю ў першую чаргу ўрад Украіны у тым, што адбываецца, з-за знаходжання фашысцкіх арганізацый".

Праўда, ва ўкраінскім урадзе Еўрарадыё не адшукала ніводнага прадстаўніка Правага сектара. Прэм'ер-міністр краіны з партыі "Бацькаўшчына", таксама як і старшыня Вярхоўнай рады. На выбарах прэзідэнта лідар Парвага сектара набраў 1 працэнт галасоў. А сярод усіх міністраў і дэпутатаў няма ніводнага чалавека з Правага сектара.

Рэдактарка газеты "Турызм і адпачынак" Лілія Кобзік тлумачыць, што гэта фельетон, які з'явіўся з нагоды бойкі.

"Там сканчалася тым, што беларусы мусяць рабіць за мяжой тое, што мы робім лепш за ўсё - маўчаць. А размаўляць будзем на кухні, таму замаўляйце апартаменты з кухняй. Я такія артыкулы пішу не першы год, гэта такі лёгкі саркастычны матэрыял".

"Таму, уласна кажучы, за мяжой нам застаецца рабіць толькі тое, што беларусы навучыліся рабіць лепш за ўсё - маўчаць! А гаварыць будзем, як заўсёды, на кухні. Так што, заказвайце апартаменты з кухняй і - наперад, на адпачынак!"

У матэрыяле сапраўды няма ніякіх абразаў і не было парадаў, каб не адкрываць рот за мяжой, але, каб не нашкодзіць рэдакцыі, яго вырашылі зняць, бо пабаяліся, што званок ад адной турфірмы - гэта толькі першая ластаўка.

"Проста мне не захацелася правяраць, наколькі ў нас з гэтым усё дрэнна. Мне падалося, што я згубіла нейкую сувязь з турбізнэсам, і калі такія званкі ёсць, то мне, як рэдактару, трэба было прымаць рашэнне".

Лілія Кобзік кажа, што на падставе інфармацыі з розных турыстычных сайтаў расійскія турысты нервуюцца, што іх могуць дрэнна прымаць за мяжой.


"Шмат якія турысты з Расіі, напрыклад, тыя, якія прыязджаюць у Беларусь, яны інтэлігентныя людзі, зацікаўленыя гісторыяй. Але ёсць жа сярэдняя тэмпература па шпіталі, і яна паказвае, што расейцаў не вельмі любяць за мяжой".

Але калі раней гэта былі клішэ, якія існуюць адносна іншых краін, то цяпер з'явіліся і іншыя нагоды і яны пачалі баяцца варожасці да сябе.

Такую варожасць могуць адчуць і беларусы, бо мы мала чым адрозніваемся знешне і размаўляем на той жа мове. Таму Лілія Кобзік проста раіць паводзіць сябе інтэлігентна. Але калі недзе варожасць ёсць, то і мы яе адчуем, бо для многіх краін мы таксама "Раша".

Апошнія навіны

Галоўнае

Выбар рэдакцыі