У Пінску будзе каманда па сядзячым валейболе
Пінскі фізкультурна-спартовы клуб інвалідаў “Ветразь” ініцыяваў стварэнне ў горадзе каманды па сядзячым валейболе.
У гэтым відзе спорту, як правіла, удзельнічаюць людзі з ампутаванымі канечнасцямі. Падтрымаць пінчукоў пагадзілася валейбольная каманда з Брэста, якая правяла паказальную гульню на спартовым комплексе “Хваля” Палескага дзяржуніверсітэту.
Цікава, што ў гэты дзень каманда інвалідаў гуляла супраць каманды здаровых спартоўцаў, складзенай са студэнтаў универсітэта. І перамогу атрымалі людзі з абмежаванымі магчымасцямі.
Сядзячы валейбол з’яўляецца паралімпійскім відам спорту. Па ім рэгулярна праводзяцца чэмпіянаты свету і Еўропы. У Беларусі каманды па сядзячым валейболе ёсць у Мінску і Мінскай вобласці, Брэсце, Маглёве і Віцебску. Яны ўдзельнічаюць у адкрытым чэмпіянаце Беларусі, у якім таксама гуляе прафесійная каманда з Масквы.