У Магілёве залуналі бел-чырвона-белыя сцягі (фота)
У Магілёве прадстаўнікі Беларускай сацыял-дэмакратычнай партыі (Грамады), Аб’яднанай Грамадзянскай партыі, Партыі БНФ і аргкамітэта партыі Беларуская Хрысціянская дэмакратыя правялі 27 ліпеня супольны пікет з нагоды гадавіны прыняцця Дэкларацыі аб дзяржаўным суверынітэце.
Пікет адбыўся ў цэнтры Магілёва на вуліцы Ленінскай. Міліцыі і людзей у цывільным не было. Мерапрыемства спалучалася са зборам подпісаў у падтрымку дэмакратычных прэтэндэнтаў на дэпутацкія мандаты Палаты прадстаўнікоў.
Са словаў удзельнікаў пікету, выбарчая кампанія фактычна легалізавала нацыянальную сімволіку і дазволіла дэмакратам збірацца на вуліцах горада.
Дэкларацыя аб дзяржаўным суверэнітэце была прынятая Вярхоўным Саветам 27 ліпеня 1990 года. Яна стала першым крокам да рэальнай незалежнасці Рэспублікі Беларусь.
