У БДУ прахадны бал на рускую філалогію за год падскочыў на 112 пунктаў

Белдзяржуніверсітэт апублікаваў сёлетнія прахадныя балы на спецыяльнасці дзённай бюджэтнай формы навучання. Таксама прыводзяцца прахадныя балы, якія былі на гэтых спецыяльнасцях у 2015 годзе.

У параўнанні з мінулым годам на 30 спецыяльнасцях конкурс вырас, але прахадны бал мяняўся не настолькі істотна — у межах 5-15 балаў. Зрэшты, ёсць адна спецыяльнасць, дзе прахадны бал падскочыў ажно на 112 пунктаў — гэта “руская філалогія”. Калі ў 2015 годзе для паступлення туды дастаткова было набраць 245 балаў з 400, то сёлета там трэба ўжо 357 балаў.

На 23 спецыяльнасцях прахадны бал наадварот знізіўся. Напрыклад, для паступлення на міжнародную журналістыку сёлета дастаткова 317 балаў, а летась трэба было 346. На спецыяльнасць “хімія лекавых злучэнняў” сёлета паступаюць з 314 баламі, а летась трэба было сама меней 356.

Яшчэ на дзвюх спецыяльнасцях прахадныя балы засталіся нязменнымі — “лагістыка” (370) і “сусветная эканоміка” (367).

Найвышэйшыя прахадныя балы сёлета на спецыяльнасцях “міжнародныя адносіны” і “міжнароднае права” (382).