Ролік "Беларусь. Звыш за чаканне" каштаваў 29 990 рублёў

Рэкламны ролік для Дзяржаўнай установы "Нацыянальнае агенцтва па турызме" каштаваў 29 990 рублёў —15 549 долараў па курсе Нацбанка на дзень падпісання дамовы. Згодна з сайтам icetrade.by, тэндар выйграла прыватнае прадпрыемства "ВАРВІС".

За гэтыя грошы павінныя стварыць: адзін пяціхвілінны відэаролік (асноўны відэаролік); адзін троххвілінны відэаролік (нарэзка асноўнага відэароліка); пяць 30-секундных відэаролікаў (таксама нарэзка асноўнага відэароліка).

Пакуль свет пабачыў толькі асноўны ролік на 5 хвілін — "Беларусь. Звыш за чаканне". Менавіта так, з памылкай, называецца ролік. Згодна са слоўнікам Крапівы, правільна пісаць "звыш чакання".

Ролік, разлічаны на рэкламу Беларусі за мяжой, зроблены толькі на беларускай мове і нават не мае субтытраў на іншых мовах.

Былі іншыя прапановы, але пераможцам абралі самы дарагі варыянт.

ЧУП "ВАРВИС" — 29 990

ООО "Грин Медиа продакшн" — 22 200

ЧУП "СТУДИЯ Р-2" — 29 700

ЧУП "Промофильм" — 27 000

ООО "Гениальный штаб" — 24 700

Распрацоўка сайта Belarus.travel каштавала 26 700 рублёў. Перамог на конкурсе прыватны прадпрымальнік Тамашэвіч Мікалай Аляксандравіч. За гэтыя грошы трэба было зрабіць сайт на рускай, беларускай, англійскай, польскай і нямецкай мовах, таксама для прасоўвання турыстычных магчымасцяў Беларусі за мяжой. Але на сённяшні дзень мы бачым толькі рускамоўны сайт.