Пачаўся суд па выбуху на "Пінскдрэве"
Працэс вядзе Брэсцкі абласны суд. Крымінальная справа заняла 56 тамоў.
Як піша "Вечерний Брест", на лаве абвінавачваных апынуліся тры чалавекі. Гэта ўжо былыя галоўны інжынер холдынгу "Пінскдрэў" Уладзімір Шастакоў, дырэктар заводу «Пінскдрэў-ДСП» Леанід Логвін і галоўны інжынер гэтага ж прадпрыемства Ігар Логвін.
Леаніда Логвіна вінавацяць у службовай халатнасці, яго калег — у парушэнні патрабаванняў пажарнай бяспекі, што пацягнула за сабой гібель людзей і матэрыяльную шкоду прадпрыемству ў асабліва буйным памеры.
Нагадаем, трагедыя на заводзе ДСП адбылася 25 кастрычніка 2010 года. Загінулі 14 чалавек, яшчэ 7 атрымалі траўмы. Выбуховая хваля разбурыла цэх па вытворчасці драўняна-стружкавых пліт. Шкода склала 3 млрд 949 млн рублёў, у доларавым эквіваленце на момант аварыі яна складала прыкладна 1,2 мільёна.
Нагадаем, што гендырэктар холдынгу "Пінскдрэў" Ларан Арыніч з'ехаў за мяжу нібы на лячэнне і ў Беларусь больш не вярнуўся. Крымінальная справа на яго вылучаная ў асобную вытворчасць, сам Арыніч абвешчаны ў вышук. Пацярпелыя і іх сваякі мяркуюць, што Арынічу наўмысна дазволілі схавацца ад следства і суда. Яны патрабуюць паскорыць яго вышук.