Пабачыла свет кніга палітвязня Алеся Бяляцкага
500-старонкавае выданне "Асвечаныя беларушчынай" уклала Паліна Сцепаненка.
У зборнік увайшлі як старыя артыкулы Бяляцкага, прысвечаныя беларускім літаратарам, так і новыя, напісаныя за кратамі. У прыватнасці, туды трапілі рэцэнзіі на кнігі вершаў Уладзіміра Някляева і Аляксандра Фядуты, створаныя ў СІЗА КДБ.
Пра гэта Еўрарадыё распавяла паплечніца зняволенага праваабаронцы Таццяна Равяка.
Равяка: "Літаральна на днях выйшла кніжка Алеся Бяляцкага. Называецца "Асвечаныя беларушчынай". Гэта кніга яго літаратуразнаўчых артыкулаў і эсэ, якую ён планаваў выдаць да свайго 50-годззя. Але, як ведаеце, 50-годдзе і год да гэтага юбілею Алесь правёў за кратамі. І таму яго калегі вырашылі, што гэтая кніга ўсё ж павінна выйсці".
Кніга выйшла накладам 1000 асобнікаў. Па словах Равякі, набыць яе можна будзе па-за дзяржаўнай сістэмай кнігараспаўсюду. Дарэчы, сам аўтар ужо атрымаў асобнік.
У лютым плануецца правесці прэзентацыю выдання.