Гістарычная вёска пад Брэстам мае 4 афіцыйных назвы (фота)
Шыльды з версіямі нават суседзяць адна з адной.
Вёска Выстычы (так напісана на штатным знаку “населены пункт”) знаходзіцца на беразе ракі Лясной у некалькіх кіламетрах ад Брэста. На аўтобусным прыпынку ў самой вёсцы прымацаваная рускамоўная шыльда з надпісам “Выстычи”. На наступным аўтобусным прыпынку вісяць адразу дзве шыльды — адна для аўтобусаў, другая для маршрутак.
Аўтобусы прыбываюць у “Выстычы”, маршруткі ў “Вистичи”. І нарэшце, на ўездзе і выездзе гэтай вёскі побач са штатным знакам стаіць шыльда, на якой па-руску напісана “Агрогородок Вистычи”.
Вёска вядомая дзвюма цікавосткамі: храмам Узвышэння Крыжа сярэдзіны 18-га стагоддзя і ўнікальнай Калонай Божай Маці, якой таксама больш за 200 гадоў.
У Чарнаўчыцкім сельсавеце, да якога належыць вёска Выстычы, не далі рады патлумачыць, чаму ўзніклі чатыры афіцыйных назвы вёскі. Мяркуюць, што дарогу абслугоўваюць розныя арганізацыі, таму такі разнабой.