Расіянам забароняць купляць "санкцыйныя" прадукты з Беларусі і Казахстана
Расійскаму ўраду прапануюць даць права забараняць абарот тавараў, якія паступаюць з іншых краін — чальцоў Еўразійскага эканамічнага саюза. Такі законапраект падрыхтаваў Мінфін Расіі, паведамляе РБК. 13 лютага гэты закон праект ухваліла ўрадавая камісія па заканатворчай дзейнасці.
Нагадаем, што ў ЕАЭС, акрамя Расіі, уваходзяць Беларусь, Казахстан, Арменія ды Кіргізія.
Пад забарону могуць трапіць тавары, якія ўвозяцца ў гэтыя краіны з трэціх дзяржаў па правілах, адрозных ад правілаў ЕАЭС і Расіі. Гэта тавары, на якія ў нейкіх краінах ЕАЭС дзейнічаюць заніжаныя прывозныя пошліны або іх імпарцёрам даюць не прадугледжаныя ў ЕАЭС льготы. Акрамя таго, пад забарону на ўвоз могуць трапіць тавары, на якія Расія наклала санкцыі, а таксама "іншыя катэгорыі тавараў, якiя вызначаюцца ўказамі прэзідэнта Расіі".
У Расіі кажуць, што з Казахстана да іх ідуць тавары з краін Сусветнай гандлёвай арганізацыі, а з Беларусі — "санкцыйныя" прадукты. На думку аўтараў, законапраект адпавядае дамове аб стварэнні ЕАЭС.
Новы законапраект пакідае за грамадзянамі Расіі права ўвозіць "санкцыйныя" прадукцыю ў краіну. Яго мэта — забараніць гандаль гэтымі таварамі ўнутры Расіі. Цяпер увоз "санкцыйных" прадуктаў забараняе Рассельгаснагляд, спасылаючыся на неадпаведнасць санітарным патрабаванням. Па словах распрацоўшчыкаў, пасля прыняцця закона ўвоз тавараў зможа забараняць урад сваім рашэннем.