МЗС Расіі адрэагавала на публікацыю ў Казахстане пра Адольфа Гітлера (фота)
Масква спадзяецца, што ўлады Казахстана прымуць меры ў сувязі з публікацыяй у адным з часопісаў матэрыялаў пра лідара нацысцкай Нямеччыны.
Расійскае пасольства ў Астане накіравала ноту МЗС Казахстана яшчэ 18 красавіка.
"Напярэдадні 69-й гадавіны нашай агульнай перамогі ў Вялікай Айчыннай вайне, якая забрала жыцці мільёнаў людзей, у тым ліку рускіх і казахаў, з'яўленне такога роду "агітак" — блюзнерства ўдвая", — цытуе заяву МЗС Расіі РІА "Новости".
Нагадаем, публікацыі пра Гітлера надрукаваў красавіцкі нумар часопіса "Аныз адам" ("Чалавек-легенда"). Больш таго, увесь нумар прысвечаны нацысту, а адзін з артыкулаў мае назву "Гітлер — не фашыст". Агенства Казахстана па сувязі і інфармацыі заявіла, што часопіс, прысвечаны 125-м угодкам з дня народзінаў Адольфа Гітлера, распальвае нацыянальную варажнечу. Да выдаўцоў выдання абяцалі прыняць адэкватныя меры.
Адзначым, што скандальны нумар выйшаў накладам больш за 25 тысяч асобнікаў.
Фота — ria.ru
