Лукашэнка патлумачыў, чаму прызначыў новага міністра абароны
Па яго словах была зробленая стаўка на больш маладога і перспектыўнага генерала.
Аляксандр Лукашэнка растлумачыў, чаму прызначыў міністрам абароны Андрэя Раўкова. Па яго словах, якія перадае БелаПАН, пры выбары кандыдатуры на пасаду міністра абароны ён кіраваўся прынцыпам амаладжэння кадраў і зрабіў стаўку на больш маладога і перспектыўнага генерала.
Лукашэнка заявіў, што яго адгаворвалі ад прызначэння Раўкова, бо ён не служыў у цэнтральным апараце і не зусім знаёмы з правіламі. Але кіраўнік краіны мяркуе, што разумны чалавек заўсёды разбярэцца ў сітуацыі ў цэнтральным апараце, але і прыўнясе нешта знізу.
Раней Раўкоў быў камандуючым войскамі Паўночна-Заходняга аператыўнага камандавання. Новаму міністру абароны 47 гадоў. Ён прайшоў шлях ад лейтэнанта да генерала. Камандуючым войскамі Паўночна-заходняга аператыўнага камандавання Андрэй Раўкоў быў прызначаны ў лістападзе 2012 года.