Лукашэнка назваў распад СССР катастрофай для ўсяго свету
Аляксандр Лукашэнка назваў распад СССР катастрофай. Такую заяву ён зрабіў на сустрэчы са студэнтамі Пекінскага ўніверсітэта, перадае БЕЛТА.
"Я адназначна разглядаю распад Савецкага Саюза як катастрофу, якая мела і мае негатыўныя наступствы ва ўсім свеце. Нічога добрага ад распаду мы не атрымалі", — заявіў Аляксандр Лукашэнка, які стаў кіраўніком Беларусі дзякуючы распаду СССР.
Ён дадаў, што адносіны паміж Савецкім Саюзам і Кітаем не заўжды былі добрымі — даходзіла і да вайсковых канфліктаў на мяжы. Але, на думку Лукашэнкі, у гісторыі ўзаемаадносінаў паміж савецкімі і кітайскімі людзьмі заўсёды было больш добрага. Добрым прыкладам ён назваў агульную перамогу над фашызмам і японскім мілітарызмам.
Лукашэнка лічыць, што Савецкі Саюз быў фактарам стрымлівання і забеспячэння стабільнасці ў свеце. Па яго словах, многія цяперашнія канфлікты ў часы СССР былі б немагчымыя — у прыватнасці, ён назваў Блізкі Усход і Афрыку. "Знік Савецкі Саюз, і, вы бачыце, свет завагаўся на адной апоры. Я не асуджаю тут амерыканцаў, але факт застаецца фактам. Апора адна — і свет хістаецца", — заявіў кіраўнік Беларусі.
Асновай для шматпалярнага свету ён бачыць Кітай, адзіную постсавецкую прастору і Еўрасаюз.
