Інтэрнэт-троляў у Брытаніі будуць саджаць на два гады
Брытанскі міністр юстыцыі Крыс Грэйлінг абвясціў планы ўраду ўвесці больш жорсткае пакаранне для інтэрнэт-троляў.
Паводле Грэйлінга, асобам, якія публікуюць у сеціве абразлівыя матэрыялы або пагрозы на адрас іншых людзей, будзе пагражаць два гады турмы. Гэта ў чатыры разы болей за максімальны тэрмін, прадугледжаны цяперашнім заканадаўствам.
Такое рашэнне прынятае пасля серыі гучных скандалаў, звязаных з абразамі і цкаваннем у сеціве.
Адна з апошніх ахвяраў інтэрнэт-тролінгу ў Брытаніі, тэлевядучая Хлоя Мейдэлі выказала падтрымку планам ураду.
“Трэба прызнаць, што нельга апраўдваць пагрозы фізічнай расправы, спасылаючыся на свабоду слова, — прыводзіць яе словы ВВС. — Такія пагрозы павінны ўспрымацца як анлайн-тэрарызм, і іх неабходна забараніць”.
