ФК “Нафтан” прыме ўдзел у чэмпіянаце краіны нягледзячы на фінансавыя праблемы
Футбольны клуб “Нафтан” прыме ўдзел у чэмпіянаце краіны, хоць і мае праблемы з фінансаваннем. Пра гэта ў інтэрв’ю Прессболу заявіў галоўны трэнер каманды Алег Сідарэнкаў. Па яго словах, клуб не меў ілюзіяў наконт грашовай падтрымкі з боку завода “Нафтан” — гэта непрыбытковае прадпрыемства, да таго ж яно не мае генеральнага дырэктара, які мог бы прыняць рашэнне пра выдзяленне сродкаў на футбол.
Паводле Сідарэнкава, цяпер фінансаваннем клуба займаецца канцэрн “Белнафтахім”, а таксама дапамогу абяцала Беларуская федэрацыя футболу.
“Натуральна, у фінансавым плане мы ў беларускім футболе бедакі, але з гэтай нагоды асаблівых ілюзіяў не маем. Праца ідзе. Да пачатку чэмпіянату засталося тры тыдні, мяркую, за гэты час усё стане на свае месцы”, — сказаў трэнер “Нафтана”.
