ЕГУ: Уступная кампанія пачынаецца. Гаворкі пра закрыццё ўніверсітэта не вядзецца

ЕГУ: Уступная кампанія пачынаецца. Гаворкі пра закрыццё ўніверсітэта не вядзецца

Скандынаўскія краіны спыняюць фінансаванне Еўрапейскага гуманітарнага ўніверсітэта. Пра гэта заяўляе Паўночны савет — савет міністраў замежных спраў краін Скандынавіі і Балтыі.

Афіцыйна паведамляецца, што такое рашэнне было прынятае з прычыны рэструктурызацыі бюджэту, каб вызваліць сродкі для працы па інтэграцыі бежанцаў і мігрантаў. Падкрэсліваецца, што рашэнне грунтуецца па выніках працэсу, у якім прадметам абмеркавання былі роля і стратэгія ЕГУ.

ЕГУ: Уступная кампанія пачынаецца. Гаворкі пра закрыццё ўніверсітэта не вядзецца

Прэзідэнт студэнцкага прадстаўніцтва ЕГУ Дзяніс Кучынскі кажа, што гэтая сітуацыя моцна паўплывае на фінансавы стан універсітэта, і цяпер стаіць пытанне, ці зможа ўстанова атрымаць дадатковыя грошы з іншых крыніц, напрыклад, ад Еўракамісіі. Далейшы лёс універсітэта будзе вырашацца на пасяджэнні кіраўнічай рады ЕГУ ў чэрвені.

“Пра тое, што спыніцца фінансаванне ад паўночных краін, было вядома і раней. Таму гэтую сітуацыю прадугледжвалі. На тых студэнтаў, якія цяпер вучацца, і тых, якія яшчэ будуць паступаць, ужо прадугледжаная пэўная фінансавая падтрымка”, — кажа Кучынскі.

На думку прэзідэнта студэнцкага прадстаўніцтва, такая сітуацыя склалася з некалькіх прычынаў. Па-першае, праз знешнія акалічнасці: пэўны крызіс у Еўрасаюзе, сітуацыя з уцекачамі. Другая прычына — непразрыстая і нездавальняючая для донараў сітуацыя з кіраўніцтвам універсітэта, пачынаючы ад структуры і працы кіраўнічай рады і да рэктарскага пытання.

“Каб захаваць універсітэт у працоўным стане, патрэбныя вялікія змены ў кіраўніцтве, але таксама трэба і аднаўляць пэўны давер, у тым ліку сярод донараў”, — мяркуе Кучынскі.

Ён супакойвае, што “на дадзены момант ЕГУ не закрываецца”, але яго далейшы лёс будзе вырашацца ў чэрвені.

ЕГУ: Уступная кампанія пачынаецца. Гаворкі пра закрыццё ўніверсітэта не вядзецца

Культуролаг, былы выкладчык ЕГУ Максім Жбанкоў выказвае меркаванне, што фінансаванне паўночнымі краінамі было спыненае не таму, што грошы былі перанакіраваныя на барацьбу з уцякацкім крызісам, а таму, што ва ўніверсітэце цяпер сістэмны крызіс.

“Гэта лагічныя вынікі той топ-менеджарскай бездапаможнасці, якую кіраўніцтва дэманстравала цягам апошніх гадоў. І ў гэтым плане дзіўна, што гэта не адбылося раней”, — кажа Жбанкоў.

У аддзеле набору абітурыентаў універсітэта паведамляюць, што ўступная кампанія на новы навучальны год пачынаецца ўжо 13 траўня.

“Усё добра. Набор адкрыты. Людзі на праграмы будуць набірацца. І гаворкі пра закрыццё праграмы ці закрыццё ўніверсітэта зусім не вядзецца”.

Еўрапейскі гуманітарны ўніверсітэт (ЕГУ) — прыватны, некамерцыйны ўніверсітэт, заснаваны ў Мінску ў 1992 годзе. У 2004 годзе пасля закрыцця ў Беларусі ЕГУ працягнуў сваю дзейнасць у Вільні. Установа існуе за кошт міжнародных грантаў і прапануе магчымасць атрымаць бакалаўрскую, магістарскую і доктарскую ступені ў галіне гуманітарных і сацыяльных навук. Па стане на 1 кастрычніка 2015 года колькасць студэнтаў складала каля 1100 чалавек, 95% з якіх — грамадзяне Беларусі. Мовы выкладання – беларуская і руская, некаторыя курсы чытаюцца на англійскай, нямецкай і іншых мовах. ЕГУ займае 2-е месца ў рэйтынгу прыватных універсітэтаў Літвы.

Апошнія навіны

Галоўнае

Выбар рэдакцыі