Дзярждума Расіі можа ўвесці ліміт на замежныя стравы ў рэстаранах
З ініцыятывай выступіў дэпутат ад КПРФ Вадзім Салаўёў.
На восеньскую сесію Дзярждумы Расіі могуць вынесці законапраект, згодна з якім кавярні і рэстараны мусяць мець у сваім меню не менш за 50% страваў традыцыйнай рускай кухні. Як піша газета "Известия", такі закон рыхтуе дэпутат ад КПРФ Вадзім Салаўёў.
Гаворка ідзе пра тыя рэстараны і кавярні, якія не спецыялізуюцца на нейкай нацыянальнай кухні.
Салаўяў кажа, што ў Расіі трэба надаваць больш увагі нацыянальным элементам культуры, у тым ліку кухні. Ліміт на замежныя стравы ў рэстаранах і кавярнях, на думку дэпутата, прывядзе да адраджэння і развіцця гастранамічных традыцый Расіі, а таксама прывабіць замежных турыстаў.
Нагадаем, што мінскія ўлады раней таксама настойліва рэкамендавалі неспецыялізаваным кавярням і рэстаранам мець у сваім меню старонку нацыянальнай беларускай кухні.
Фота: izvestia.ru