Дзе згубіліся беларусы, што ішлі на “заробкі” да сепаратыстаў “ЛНР”?

Першым пра затрыманне двух беларусаў, якія ехалі да сепаратыстаў на Данбасе, але былі затрыманыя праваахоўнікамі на блокпосце пры выездзе з Лісічанска, паведаміў кіраўнік Луганскай ваенна-грамадзянскай адміністрацыі Генадзь Маскаль.

“Ішлі канкрэтна да аднаго з кіраўнікоў бандытаў — Мазгавога, расстралянага ўчора каля Алчэўска. Не забыліся ўзяць з сабой ваенныя білеты, якія знайшлі падчас вобшуку. Разлічвалі атрымліваць штомесяц па некалькі тысяч долараў, хоць такіх грошай там і блізка не плацяць. Тое, што давядзецца страляць ва ўкраінцаў, для іх, відаць, было неістотна. Цяпер з затрыманымі працуюць нашы спецслужбы. Найбліжэйшым часам іх хутчэй за ўсё выдвараць на бацькаўшчыну, хай з імі разбіраюцца беларускія сілавыя структуры”, — напісаў Генадзь Маскаль на сваім афіцыйным сайце 24 траўня.

Як паведамлялася раней, затрыманыя — мужчыны 34 і 37 гадоў. Яны прыехалі ва Украіну з Брэсцкай вобласці. Адзін — былы дэсантнік, другі не служыў, але стаіць у рэзерве на ваенным уліку. Вырашаем высветліць далейшы лёс “баевікоў”.

Раніцай 26 траўня прэс-сакратар упраўлення МУС Украіны ў Луганскай вобласці Таццяна Пагукай расказвае Еўрарадыё, што беларусаў перадалі Службе бяспекі Украіны і іх, найхутчэй, будуць судзіць.

Таццяна Пагукай: “Калі выявяць у іх дзеяннях правапарушэнні, за якія прадугледжаная ўкраінскім заканадаўствам крымінальная адказнасць— значыць, будуць яны адказваць. Калі не знойдуць у іх дзеяннях нічога супрацьпраўнага, іх дэпартуюць на тэрыторыю Беларусі”.

Праўда, ніякіх падрабязнасцяў расследавання Таццяна Пагукай не ведае — беларусаў перадалі СБУ, і далейшы іх лёс цалкам залежыць ад спецслужбаў.

Вось толькі ў самой СБУ нам паведамляюць, што беларусаў… практычна адразу пасля затрымання дэпартавалі на радзіму!

Прэс-служба СБУ: “Яны былі дэпартаваныя адразу. Ні следчых дзеянняў не было, ні нейкіх працэдур — нічога”.

Тое, што нашых суайчыннікаў нібыта ўжо дэпартавалі ў Беларусь, стала сюрпрызам для беларускага МЗС.

“На дадзены момант ніякага афіцыйнага паведамлення ў нас няма, пасольства наша працуе”, — адказвае на пытанне пра лёс затрыманых пад Лісічанскам беларусаў кіраўнік прэс-службы МЗС Марыя Ваньшына. Але я перадаю ёй атрыманую ад Службы бяспекі Украіны інфармацыю пра дэпартацыю, і Ваньшына пры мне яшчэ раз набірае консульскі аддзел — па-ранейшаму ніякай інфармацыі.

Няма на гэты конт ніякай інфармацыі ні ў Брэсцкім абласным упраўленні МУС, ні ў самім МУС Беларусі, ні ва Упраўленні КДБ па Брэсцкай вобласці.

Фота: uapress.info