Рэдкія словы за 4 чэрвеня 

Што такое балонка

Разам з вяртаннем эмігрантаў у нашае жыццё ў беларускай мове стаў назірацца даплыў мноства раней не чутых словаў. Некаторыя з іх і дагэтуль выклікаюць здзіўленне, бо гэта проста англіцызмы, перайначаныя на беларускі капыл.

Іншыя ж вяртаюць нам подых падзабытых на бацькаўшчыне старадаўніх словаў. Многія з іх актыўна пачынаюць ужывацца новымі носьбітамі ўжо тут. Асабліва часта сустракаюцца яны ў Інтэрнэце. Так, раз-пораз сустракаецца такое азначэнне, як “Інтэрнэт-балонка”, яна ж — Інтэрнэт-старонка. І амаль заўсёды гэтае слова выклікае пытанні.

Балонкай называлі старонку яшчэ ў 20-я гады мінулага стагоддзя. У прозе Лукаша Калюгі чытаем: “Марка палажыў газету, дзе падрабязна (на цэлыя тры балонкі) тлумачылася, адкуль і як узяўся вялікдзень”.

Зрэшты, не адны толькі эмігранты захавалі гэтае слова праз гады. Вось і ў адным з вершаў Пімена Панчанкі бачым: “Свішча рацыя таропка. На балонках рад у рад — і працяжнікі і кропкі...”

Таму не палохайцеся гэтага малазнаёмага слова, калі сустрэнеце яго ў Інтэрнэце.