Міліцыя разагнала акцыю апазіцыі ў цэнтры Мінска (ВІДЭА)

Удзельнікаў пікету каля дзвюх гадзін пратрымалі ў Цэнтральным РУУС, пасля чаго адпусцілі без складання пратаколаў. Падчас разгону сілавікі зноў перашкаджалі працаваць журналістам (ОНЛАЙН).

Больш за дзесяць чалавек затрыманыя 8 лютага на Кастрычніцкай плошчы Мінска. Пры разгоне акцыі спецназ зноў не даваў журналістам працаваць.

Як нагадвае "Хартыя'97", актывісты апазіцыі збіраліся правесці 8 лютага акцыю салідарнасці з палітвязнямі Мікалаем Аўтуховічам і Ўладзімірам Асіпенкам. Іх ужо роўна год трымаюць у следчым ізалятары.

За паўгадзіны да пачатку акцыі на плошчы і праспекце Незалежнасці, каля выхаду з метро і падземных пераходаў дзяжурылі людзі ў цывільным.

Прыкладна ў 18 гадзін каля 15 актывістаў маладзёжных апазіцыйных рухаў сталі на Кастрычніцкай плошчы, трымаючы партрэты ваўкавыскіх прадпрымальнікаў. Практычна адразу да іх падбеглі людзі ў цывільным і ўзялі ў кола. Праз дзве-тры хвіліны на плошчу ўехалі два аўтоубсы з супрацоўнікамі міліцэйскага спецназу, якія затрымалі маладых людзей.

Сярод затрыманых – актывісты грамадзянскай кампаніі "Еўрапейская Беларусь" Яўген Афнагель, Паліна Кур'яновіч, Максім Вінярскі, лідэр "Моладзі БНФ" Андрэй Крэчка, адзін з лідэраў "Маладога фронту" Мікола Дземідзенка ды іншыя.



Па інфармацыі агенцтва БелаПАН, як і раней невядомыя людзі ў цывільным перашкаджалі працаваць журналістам, закрывалі аб'ектывы фота- і відэакамер, спрабавалі адціснуць журналістаў ад месца падзеі.


Удзельнікаў акцыі салідарнасці з Мікалаем Аўтуховічам і Ўладзімірам Асіпенкам адвезлі ў Цэнтральны РУУС, дзе трымалі ў актавай зале і высвятлялі асобы, перадало Радыё "Свабода". Трымаць іх на законных падставах міліцыянты мелі права да 21-й гадзіны.


Усіх затрыманых выпусцілі з пастарунку пасля 9 вечара. Як паведаміў карэспандэнт Еўрарадыё Валера Руселік, актывістаў апазіцыі выпусцілі без складання пратаколаў.

Нагадаем, ваўкавыскія прадпрымальнікі Мікалай Аўтуховіч і Ўладзімір Асіпенка былі затрыманыя роўна год таму, 8 лютага 2009 года. Іх вінавацяць у падрыхтоўцы да тэракту.

Фота: Радыё "Свабода"

Глядзі таксама:
У Мінску акцыю апазіцыі разагналі адразу пасля яе пачатку
Затрыманых удзельнікаў акцыі ў Мінску адвезлі ў міліцыю Цэнтральнага раёну