“Рок-каранацыя” сёлета стане клубнай і аб’яднаецца з рэпам і поп-рокам

У інтэрв’ю Еўрарадыё арганізатар фэсту Юрый Цыбін назваў хэдлайнераў сёлетняй цырымоніі, распавёў пра новыя намінацыі і змены фармату.

Сёлетняя “Рок-каранацыя”, прызначаная на 4 сакавіка, нечакана пройдзе ў клубе “Рэактар”, перамясціўшыся туды з вялікіх канцэртных залаў. Разам з тым, як распавёў Еўрарадыё заснавальнік фэсту Юрый Цыбін, чакаецца чарговая змена фармату "Рок-каранацыі".

Юрый Цыбін: “У гэтым годзе будзе “Рок-каранацыя” з пашыраным фарматам удзельнікаў гэтага фэсту. Будзе нейкі рэпавы гурт, альтэрнатыўны гурт. Сапраўды альтэрнатыўны — не тое, што маюць на ўвазе, калі паказваюць нейкія рок-канцэрты альтэрнатыўнага року. Гэта будзе сапраўды альтэрнатыўны гурт, які грае, магчыма, не рок-музыку. І я спрабую ўвесці такі фармат, як поп-рок”.

Летась “Рок-каранацыя” праходзіла ў Маладзечне ў суправаджэнні мясцовага сімфанічнага аркестра. Тады ж арганізатары заявілі, што ў 2010 годзе з назвы фэсту знікне слова “Рок”. Маўляў, будзе пашыраны фармат і за ўзнагародамі на сцэну выйдуць не толькі рокеры. Але сёлета, напярэдадні чарговай “Рок-каранацыі”, заснавальнік фэсту Юрый Цыбін адхрышчваецца ад гэтых слоў.

Юрый Цыбін: “З маіх вуснаў такая інфармацыя ніколі не сыходзіла. Яна сыходзіла ад маіх калег, якія дапамагаюць мне рабіць “Рок-каранацыю”. Яны мяне ўвесь час стараюцца ўпэўніць у тым, што трэба змяніць назву, змяніць фармат. Але хоць ад мяне гэтая інфармацыя не сыходзіла, я яе і не абвяргаў”.

Паводле яго слоў, адмаўляцца ад назвы, звыклага брэнда рана. Таму і сёлетняя 14-я, і юбілейная “Рок-каранацыя” ў 2011 годзе пройдуць пад старой назвай. А што будзе з ёю далей — пакажа час.

У гэтым годзе Маладзечна ізноў прэтэндавала на правядзенне “Рок-каранацыі”. Музыкі сімфанічнага аркестра нават паабяцалі вывучыць партытуру рок-песень пераможцаў. Але перавагу арганізатары аддалі мінскаму клубу. Уразіўшыся тым, як там прайшоў арганізаваны імі ж фэст "Рок па вакацыях". Нягледзячы на тое, што пераманіць да сябе “Рок-каранацыю” спрабавалі не толькі іншыя гарады, але і вялікія сталічныя залы.

Юрый Цыбін: “Нам прапаноўвала Маладзечна сёлета таксама зрабіць у іх. І дырэктар музычнага каледжа Рыгор Сарока казаў: “Давайце сёлета сімфанічны аркестр сапраўды вывучыць рэчы рок-н-рольныя — і зробім”. Прапанавалі ў Гродне зрабіць, прапанавалі некалькі вялікіх залаў у Мінску зрабіць “Рок-каранацыю”. Але чамусьці мне здаецца, што зараз патрэбна дынамічны моладзевы варыянт зрабіць менавіта ў клубе”.

Не спраўдзілася і яшчэ адно леташняе прадказанне — аб правядзенні “Рок-каранацыі” ў Оперным тэатры. Тым не менш, Юрый Цыбін не адмаўляецца ад гэтай ідэі і абяцае, што ў наступным годзе яна абавязкова пройдзе менавіта там.

Юрый Цыбін: “У наступным годзе, калі мы наступную, 15-ю “Рок-каранацыю” зробім, яна пройдзе ў Оперным тэатры. Яны пра гэта не ведаюць, але я зраблю ўсё, каб нейкі вынік падвесці цікава”.

На гэтым новоўвядзенні і сюрпрызы заканчваюцца. Прынамсі, ніякіх зменаў у намінацыях не чакаецца. Пакуль.

Юрый Цыбін: “Рок-князёўна” адназначна будзе. Адназначна — “Традыцыя і сучаснасць”, “Рок-карона”. “Дэбют”, “Падзея”, “Альбом”, “Песня” — гэта ўсё застанецца. І дададуцца нейкія іншыя намінацыі, уключна нейкія спецыяльныя, можа нехта нешта новае прыдумае”.

Іншае пытанне — ці ёсць каму даваць узнагароды ва ўсіх гэтых намінацыях. Юрый Цыбін сцвярджае, што, нягледзячы на адсутнасць ў мінулым годзе асабліва яскравых падзей ў жыцці айчыннага рок-н-рола, узнагароджваць ёсць каго і ёсць за што.

Юрый Цыбін: “Ёсць з чаго выбіраць. На жаль, не з’явілася, як пазалетась, яскравых адкрыццяў, якія хацелася б асабліва вызначыць, але ж, нягледзячы ні на што, нейкія падзеі ў беларускім рок-н-роле адбываліся. І гэта мяне вельмі радуе. Бо я ведаю, з чаго рабіць “Рок-каранацыю” і на што абапірацца зараз”.

Вызначаць пераможцаў будзе журы з 12 чалавек. Праўда, хто ўваходзіць у склад “прафесійнага рок-журы”, арганізатар “Рок-каранацыі” казаць не захацеў. Але ўпэўніў, што гэта людзі, якія ведаюць, любяць і разбіраюцца ў гэтай музыцы. Што тычыцца ўдзельнікаў канцэрта, то пакуль Юрый Цыбін назваў толькі хэдлайнераў.

Юрый Цыбін: “Асноўныя ўдзельнікі ў нас — гурт “Без Білета”, “Нака”, “Нейра Дзюбель”, “Крама”, “Жнюв”. “Ляпіс Трубяцкой”, спадзяюся, дасць згоду і будзе таксама. Будзе Зміцер Вайцюшкевіч. Наконт астатніх пакуль не ведаю — ідзе ўзгадненне”.

Усяго ж, кажа, у “Рок-каранацыі” возьмуць удзел 10-12 гуртоў. Увесь канцэрт-узнагароджанне будзе зняты на відэа. Потым змантуюць фільм, які арганізатары гатовыя прадаць ці нават аддаць бясплатна для паказу беларускаму тэлебачанню.