Ангела Меркель збіраецца балатавацца на чацвёрты тэрмін
Яна кіруе ўрадам ФРГ з 2005 года.
Канцлер Германіі Ангела Меркель збіраецца вылучаць сваю кандыдатуру на чацвёрты тэрмін. Пра гэта паведамляе ТАСС са спасылкай на нямецкае выданне Spiegel.
Меркель ужо абмеркавала падрыхтоўку да выбарчай кампаніі з Петэрам Таўберам — генеральным сакратаром сваёй партыі Хрысціянска-дэмакратычны саюз. Новая выбарчая кампанія павінна пачацца прыкладна праз паўтара года.
Выбары ў бундэстаг, па выніках якіх фармуецца ўрад і вызначаецца канцлер, пройдуць увосень 2017 года. На апошніх парламенцкіх выбарах у 2013 годзе блок з Хрысціянска-дэмакратычнага і Хрысціянска-сацыяльнага саюзаў набраў 41,5% галасоў. Такім чынам ён атрымаў большасць месцаў у парламенце і вылучыў свайго кандыдата ў канцлеры — Ангелу Меркель.
Згодна з апошнімі апытаннямі грамадскай думкі, найбольш папулярным палітыкам у ФРГ з’яўляецца міністр замежных справаў, сацыял-дэмакрат Франк-Вальтэр Штайнмаер, якога падтрымліваюць 72% немцаў. На другім месцы кіраўнік мінфіна Вольфганг Шойбле — 70%, на трэцім — Меркель (67%).
Меркель кіруе ўрадам Германіі з 2005 года. Яна змяніла на гэтай пасадзе Герхарда Шродэра.
Фота: EPA